Дереккөз: www.24.kz
EXPO-2017 көрмесіне қатысатын қатысушы мемлекеттер саны жоспарланғаннан асып түсті.
101 мемлекет «Астана ЭКСПО-2017» халықаралық мамандандырылған көрмесіне қатысатындығын растады.
Бұл туралы «Астана ЭКСПО-2017» баспасөз қызметі хабарлайды.
Айта кеткен жөн, бұған дейін көрмеге қатысатындығын Бразилия растап, 99-шы қатысушы мемлекет атанған болатын.
Көрменің стратегиялық құжатында Көрмеге 100 мемлекет қатысатындығы көрсетілген. Украина өзінің қатысуын нақтылаған жүзінші ел болды. Тізімді Доминикан Республикасы жалғастырды.
Бүгінгі таңда қатысу туралы шартқа 68 ел қол қойды және 87-і өздерінің комиссарларын тағайындады, бұдан басқа өз қатысуын 18 халықаралық ұйым растады.
Стандартты процедура бірнеше кезеңде өтетінін айта кеткен жөн: қатысуды нақтылау, комиссарды тағайындау және қатысу шартына қол қою.
Қазан айында халықаралық павильондар қатысушы елдерге берілетін болады. Халықаралық мамандандырылған көрме Астана қаласында 2017 жылғы 10 маусым-10 қыркүйек аралығында өтеді. Шамамен 2 миллион келуші мен 5 миллион рет кіру болжанып отыр.